زعلت مني يوم انا بوصلي ادعيك..تحسبني راضي من تغير حلاياك

زعلت مني يوم انا بوصلي ادعيك
تحسبني راضي من تغير حلاياك
اسهر بهجرانك الى نغمه الديك
لعل شوقك في دجى الليل سراك
واثرك بهجراني نويت بغزاويك
وانا بدولة وصلك اذكر سواياك
برجيك ياقلبي من الهجر برجيك
يارب في داء المواصيل يبلاك
في كل ضقية صدر جنبك اواسيك
وفي كل ضيقه صدر تأتي ماالقاك
شحيت في وصلك وقصرت خطاويك
وصارت صفات الي كرهوني مزاياك
واليا نشدتك قلت لي عايز(ن)هيك
يالعنبوها كلمة( ن )قالها فاك
خذها نصحيه حطها وسط اذانيك
احذر تبادر بالجفا منهو اغلاك
اجرت قلبي لك ومنهي بتمليك
وبعتك عيون (ن) عايشه لجل رجواك
كلي حلالك كان هذي تكفيك
يعني خلايايه تراها خلاياك
خليتني ميت على كلمه ابيك
وخليتني عايش على طيف ذكراك
حكمت روحي مثل حكم المماليك
وقمت إتفنن في جفاك وتغلاك
لو الطعون الغادره من معاليك
سدحت قلبي وانت ذكّه بشلفاك
لكن عجزت اعرف طريقة مساعيك
مر(ن)على يمناك ومر(ن) بيسراك
كلمه تجيبك لي وكلمه توديك
منت متمسك بالهوى قول وش جاك
تسقيني الفرقا وانا وصلي اسقيك
شفت العذاب اللي حصلي وانا انخاك
عذبتني بصدك وانا مقدر اعصيك
وخليت هجري بس يامرك ينهاك
زبنت صبري بس طالت لياليك
ومليت من صبري عليك اتحراك
جرحتني بهجرك عسى الله يجازيك
صار الجفا في دنيتك داك ودواك
واخذت قلبي لمصنع الهجر تشييك
سقته تبي هجره وسقته بيمناك
قلت اضربوا قلبه مع الوصل بكريك
عشان ينسى ماضي الحب وياك
لقيت قلبي طالع(ن) منه ناصيك
يبغى وصالك زابن(ن) في ذرا حماك
لاتحسب انه بعد غيبتك ناسيك
دامه عطاك عروق دمه ماينساك
وعدتني بوصلك عسى الله يخليك
ترا بطيت وصادق الشوق ناداك
اشتقت لأيامك وشقت لحكاويك
واشتقت لمزوحك وشقت لتبكاك
اشتقت ازعل خاطرك وارجع ارضيك
واشتقت اشوفك ترضي الي تمناك
واشتقت تندهني وانا اقول لبيك
واشتقت تنطق وش حياتي بلياك
لبى عروقك خذ حياتي بيديك
تفدا عيونك دام انا كلي افداك
اعشق عدو(ن) بالوفا صار يطريك
والطم رفيقي كان بالشينه اطراك
قد قالوا العربان ماعاد يمديك
تبطي عظم ماشفت وصله ولاجاك
كان الزعل والصد متمركزه فيك
ترا الوفآ والوصل فيني ترجاك
شف عرق قلبي من وريده يناديك
وشف وجه منهو بالجفا ماله ادراك
ارجع تراني ماتحمل تغليك
وكانك صملت بهجرك الله ياقاك